Ensaísta, orador, escritor, mestre de instituto e universidade, tivo una vida intelectual polifacética, enormemente marcada polo seu profundo compromiso coa profesión e as súas orixes culturais. Apuntou maneiras dende o seu paso pola universidade, primeiro en Madrid ou Salamanca e logo en Santiago, onde estudou Letras. Este primeiro contacto co mundo da xuventude máis activista, deu pé ao desenvolvemento da súa ideoloxía marxista, que casaba de marabilla co seu espírito idealista e a fervente paixón por Galiza. Así, este sentimento abandeiraría tódo-los seus aspectos vitais, competéndonos a nós lembrar especialmente, a súa influencia na práctica docente, que queda impregnada por ambos. Porén, cabe destacar que rexeita todo afán de adoutrinamento do alumnado en calquera ámbito, en beneficio do posicionamento persoal e crítico, e da importancia da defensa do que un pensa. De aparencia distante, conseguía engaiolar coa forza das súas verbas ao seu alumnado, dende un emprego exquisito das mesmas, digno de rigor científico.
Comentarios
Publicar un comentario