Xabier Puente Docampo nace en Rábade (Lugo) o 5 de abril de 1946 e morre n’A Coruña o 26 de xuño de 2018 con 72 anos de idade. Foi mestre, escritor, contacontos e actor. Promoveu a lingua e a cultura galega, así como a lectura nas bibliotecas escolares.
A súa infancia marcou a súa carreira literaria, pois estivo en contacto por medio dos seus pais coa literatura oral. Trasládase a Coruña para estudar bacharelato e maxisterio. Tras finalizar os seus estudos, tivo unha inminente inserción laboral, comezando así outra etapa na súa vida, a labor docente.
A súa metodoloxía na aula estivo vinculada aos movementos de renovación pedagóxica, en concreto á asociación fundada en Santiago de Compostela en 1983: A Nova Escola Galega.
Dentro da Nova Escola Galega participa na Revista Galega de Educación. Participa noutras revistas fora da Nova Escola Galega, como en “Fadamorgana”. Participa no proxecto “Preescolar na casa”, e estivo implicado na creación da Asociación Galega do Libro Infantil e Xuvenil.
Era un gran defensor da presencia dos libros como ferramenta educativa escolar e social, exerceu de contacontos promovendo a literatura oral en lugares que fomentan a lectura.
A principal aportación de Xabier Docampo á pedagoxía galega foi a elaboración de material didáctico para o ensino da lingua galega, a través de libros de texto escolares e de libros adicados a lectores dunha idade infantil e xuvenil, polos que tivo un grande recoñecemento: “O misterio das badaladas”, “Cun ollo aberto e outro sen cerrar”, “A chave das noces”, “Cando petan na porta pola noite”, “Catro cartas”, “A casa da luz” (adaptada ao cine), “A nena do abrigo de astracán”.
O premio máis relevante que recibiu foi o Premio Nacional de Literatura Infantil e Xuvenil, outorgado en 1995.
Comentarios
Publicar un comentario