Antonio Fraguas Fraguas

A personalidade de don Antonio caracterizouse por unha fonda humanidade; o trato afectuoso, a xenerosidade, a riqueza e amenidade da súa conversa, adobada polo preciosismo dunha linguaxe netamente popular -lémbrese que sempre reivindicou a súa orixe aldeá-, a amplitude duns coñecementos que sabía transmitir de xeito natural afastado de toda afectación, son trazos que definen un mestre cun perfil humano de calidade extraordinaria.

Don Antonio Fraguas é unha das persoas que, desde o primeiro momento (xaneiro de 1976) figuran como promotoras do Padroado do Museo do Pobo Galego. Isto foi así en razón da súa traxectoria como membro da xeración de galeguistas históricos que formaran parte do Seminario de Estudos Galegos, abolido por orde gobernativa en 1936; en 1943 integrouse no Instituto de Estudios Galegos “Padre Sarmiento”, que recolleu en parte o patrimonio, os membros e as finalidades do Seminario.

O Padroado do Museo do Pobo Galego fúndase en asemblea constituínte o 31 de xullo de 1976, baixo a presidencia de don Xaquín Lorenzo Fernández, e noméase director do museo a don Antonio Fraguas. Ao falecer don Xaquín, en 1989, don Antonio é elixido como presidente do Padroado, cargo no que permanecerá ata o seu falecemento.